Қазақстандық теннисші сенсациялық жеңіске қол жеткізді

Қазақстандық теннисші Юлия Путинцева Аделаидада (Аустралия) өтіп жатқан турнирде күтпеген нәтижеге қол жеткізді.

WTA рейтингінде 74-орында тұрған Путинцева іріктеу кезеңінің финалында чехиялық Мария Боузковамен (46) кездесіп, фаворит саналған қарсыласын екі сетте тізе бүктірді - 6:4, 7:6. Тартысты матч 2 сағат 20 минутқа созылды.

Осылайша, Юлия Путинцева турнирдің негізгі кезеңіне жолдама алып, алғашқы айналымда Венгрия өкілі Далма Галфимен (94) кездеседі.

Айта кетейік, Аделаидадағы турнирдің жалпы жүлде қоры - 1 206 446 АҚШ доллары. Жарыс жеңімпазы 185 500 доллар сыйақы алып, сондай-ақ 500 рейтингтік ұпайға ие болады.