Александр Бублик 5 сетке созылған тартыста US Open-нан шығып қалды
Теннисші әлемнің 21-ракеткасы, америкалық Томми Полмен кездесті
Қазақстанның бірінші ракеткасы Александр Бублик 2026 жылғы АҚШ ашық чемпионатындағы жекелей сындағы өнерін аяқтады.
Әлемдік рейтингте 16-орында тұрған қазақстандық теннисші үшінші айналымда әлемнің 21-ракеткасы, америкалық Томми Полмен кездесті. Бес сетке созылған матч 6:4, 3:6, 6:7 (4:7), 6:1, 6:3 есебімен алаң иесінің пайдасына аяқталды.
Бірінші партияда Бублик 4:6 есебімен жеңілгенімен, екінші сетте қарымта қайтарып, 6:3 есебімен басым түсті. Қазақстандық теннисші тай-брейкке ұласқан үшінші партияны да өз пайдасына аяқтап, сеттер бойынша алға шықты.
Алайда Томми Пол төртінші сетте ойынды толық бақылауына алып, қарсыласына бір ғана гейм берді. Шешуші бесінші партияда америкалық теннисші басымдығын сақтап, кездесуді жеңіспен аяқтады.
Матч 3 сағат 13 минутқа созылды. Осы уақыт ішінде Бублик 16 эйс орындап, алты қосарланған қате жіберді. Сондай-ақ жеті брейк-пойнттың екеуін пайдаланды.
Осылайша, Александр Бублик US Open-2026 турнирінің төртінші айналымына шыға алмады. Қазақстандық теннисші бұған дейін алғашқы кезеңде америкалық Джей-Джей Вольфты төрт сетте жеңіп, екінші айналымда франциялық Адриан Маннариноны 6:3, 6:1, 6:1 есебімен жарыс жолынан шығарған еді.
Томми Пол төртінші айналымда қытайлық У Ибин мен испаниялық Карлос Алькарас арасындағы кездесудің жеңімпазымен ойнайды.
Бубликтің Нью-Йорктегі жарысы мұнымен толық аяқталған жоқ. Ол жұптық сында қытайлық Шан Цзюнчэнмен бірге өнер көрсетеді. Алғашқы айналымда олар аргентиналық Себастьян Баэс пен мажарстандық Фабиан Марожан жұбына қарсы шығады.