Рыбакинаны рейтингте төмен сырғытқан қытайлық теннисші Australian Open турнирінде жеңіліп қалды
Қазақстанның бірінші ракеткасы үшін Аустралиядағы жарыстың жеребесі сәтті түскен
WTA рейтингінде бесінші сатыда тұрған қытайлық теннисші Чжэн Циньвэнь Australian Open турнирінде жеңіліп, жарысты ерте аяқтады.
Екінші айналымда 22 жастағы Чжэн Циньвэнь Германия өкілі Лаура Зигемундпен (#97-орын) кортқа шыққан болатын. Қытайлық теннисші бұл кездесуде айқын фаворит еді. Дегенмен, ол екі сетте де осалдық танытып, жеңісті неміс теннисшісі жұлып алды, есеп – 6:7 (3:7), 3:6.
Бұл матч 2 сағат 16 минутқа созылды. Осы уақытта Зигемунд 1 эйс, 3 дабл-фол және 3 брейк жасаған. Чжэн Циньвэнь болса 11 эйс, 2 дабл-фол және 2 брейкті еншісіне жазды.
Зигемунд келесі айналымда ресейлік екі теннисші – Анастасия Павлюченкова мен Анастасия Потапова арасындағы кездесудің жеңімпазымен кортқа шығады.
Ал, Елена Рыбакина болса бірінші айналымды сәтті бастап, екінші айналымда америкалық Ива Йовичпен кездеседі.