Бұған дейін ҚФФ-ның бұрынғы басшысы қылмыстық іс бойынша күдікке ілінгені айтылған болатын
Қазақстан футбол федерациясының бұрынғы басшысы Әділет Бәрменқұлов қылмыстық іс бойынша күдікке алынбаған.
Қаржылық мониторинг агенттігі төрағасының орынбасары Жеңіс Елемесовтың айтуынша, қылмыстық іс Қазақстан футбол федерациясына қатысты қозғалған. Алайда, ол тергеу құпиялығына сілтеме жасап, басқа мәліметтерді жариялаудан бас тартты. Ал Бәрменқұлов бұл іс бойынша күдікті емес екен.
Естеріңізде болса, еліміздің бас прокуратурасы Қазақстан футбол федерациясы мен клубтарға жүргізілген прокурорлық тексеру нәтижесінде басқарудағы тиімсіздік пен 3 млрд теңге көлемінде қаржылық бұзушылықтар анықтаған болатын.
Негізгі заң бұзушылықтар қатарында негізсіз сыйақылар төлеу, инфрақұрылым нысандарын салу кезінде қаражатты мақсатсыз пайдалану, спортшылармен жасалған күмәнді келісімдер және спортшыларды тамақтандыруға бөлінген қаржыны жымқыру оқиғалары тіркелгені айтылды.
Бүгінгі таңда бұл істі тергеп-тексеру жұмыстарын ҚМА жүргізіп жатыр.
