«Менің бір қуанатыным». Жәнібек Әлімханұлы допинг дауына қатысты мәлімдеме жасады
Мен әрқашан таза спортты қолдаймын
Қазақстандық кәсіпқой боксшы, орта салмақта WBO және IBF тұжырымдары бойынша әлем чемпионы Жәнібек Әлімханұлы допинг дауына байланысты жанкүйерлерге үн қатты. Ол В сынамасының ресми нәтижесі жарияланбай тұрып, әлеуметтік желідегі парақшасында пікір білдірді.
Боксшы алдымен өзін қолдап отырған жанкүйерлерге алғыс айтты:
«Қолдап жатқан спортшы бауырларым мен жанкүйерлерге ерекше алғыс айтамын. Шетелдіктер дауға қуанып жатқанда, өз қазағым қасымнан табылып, таза екенімізге сенім білдіріп жатқаны жаныңа демеу болады екен. Менің бір қуанатыным – бокс мансабымда жаман жанкүйер жинамаппын. Қиындықта да қолдайтын нағыз жанкүйерім бар. Бұл спортшы үшін үлкен бақ», – деп жазды ол.
Айта кетейік, желтоқсан айына жоспарланған кезекті жекпе-жек алдында алынған допинг сынамасының нәтижесі бойынша дау туындаған болатын. Осы жағдайға байланысты Жәнібек Әлімханұлы да өз ұстанымын ашық жеткізді:
«Мен әрқашан таза спортты қолдаймын. Мұны жақсы білесіздер. Таза спортты үнемі насихаттап келемін», — деді чемпион.
Осы оқиғаға байланысты орта салмақтағы жылдың басты айқасы – Жәнібек Әлімханұлы мен Эрисланди Лара арасындағы жекпе-жек ресми түрде өтпейтіні белгілі болды. Қазіргі таңда Лара WBA тұжырымы бойынша әлем чемпионы саналады.
Ұйымдастырушылар жекпе-жек тоқтатылғаннан кейін кубалық боксшыға жедел түрде жаңа қарсылас тапты. Енді Лара венесуэлалық Йохан Гонсалеспен (36-4, 34 KO) жұдырықтасады.
Еске сала кетсек, Жәнібек Әлімханұлы 1993 жылғы 1 сәуірде дүниеге келген. Әуесқой бокста 2013 жылы әлем чемпионы атанып, сол жылы Азия чемпионатында да алтын жүлдеге қол жеткізген. Қазіргі таңда кәсіпқой бокста оның рекорды – 17 жеңіс, 12 нокаут.