Тайсон Фьюри сәуірде шаршы алаңға оралады
Оның қарсыласы - ресейлік Арсланбек Махмудов
Бокстан ауыр салмақта әлемнің экс-чемпионы, британдық Тайсон Фьюри ресейлік Арсланбек Махмудовпен жекпе-жек өткізеді. Бұл туралы Netflix стримингтік платформасы X әлеуметтік желісінде жазып отыр.
Аталған жекпе-жек 11 сәуірге жоспарланған. Алдағы кездесуге байланысты Ресей боксшысы Instagram парақшасында жазба жариялап, Фьюриді жеңетініне сенімді екенін білдірді.
«Көк пен жердің Иесінің жәрдемімен мен жеңіс жолына шығамын», — деп жазды ол.
37 жастағы Тайсон Фьюри үшін бұл жекпе-жек 2024 жылдың желтоқсанында Александр Усиктен жеңілгеннен кейінгі алғашқы айқас болмақ. Ол WBC нұсқасы бойынша бұрынғы әлем чемпионы.
Британдық боксшының кәсіби мансабында 34 жеңіс (24 нокаутпен), 2 жеңіліс және 1 тең нәтиже тіркелген.
Ал 36 жастағы Арсланбек Махмудовтың еншісінде 21 жеңіс (19 нокаут) және 2 жеңілісі бар. Ол соңғы рет 2025 жылдың қазан айында шаршы алаңға шығып, британдық Дэвид Алленнен басым түскен еді.