Айбек Оралбай Өзбекстандағы этникалық қазақ боксшысын жеңді
Осылайша, ол кем дегенде қола жүлдені қамтамасыз етті.
Моңғолия астанасы Ұланбатыр қаласында өтіп жатқан бокстан Азия чемпионаты аясында Қазақстан құрамасының аса ауыр салмақтағы боксшысы Айбек Оралбай ширек финалда сәтті өнер көрсетті.
90 келіден жоғары салмақта Айбек өзбекстандық, этникалық қазақ Арман Махановпен қолғап түйістірді. Жекпе-жек барысында қарсыластардың стилі айқын байқалды: Махановтың жылдамдығы мен аяқпен қимылы жоғары болса, Оралбай прессинг жасап, шабуылға жиі көшіп отырды.
Айбек қарсыласының қозғалысына бейімделіп, әдейі ашық аймақтар қалдырып, оны ауыр соққылар жасауға итермеледі. Өз кезегінде қазақстандық боксшы джеб пен оң қолмен тура және қаптал соққыларды тиімді қолданды. Кейбір ауыр соққыларды өткізіп алғанымен, Оралбай төзімділік танытып, жекпе-жекті өз бақылауында ұстады. Соңғы раундтарда ол тіпті қолын төмен түсіріп, қарсыласына психологиялық қысым көрсетті.
Үш раунд қорытындысы бойынша төрешілердің шешімімен Айбек Оралбай 4:1 есебімен жеңіске жетіп, жартылай финалға жолдама алды. Осылайша, ол кем дегенде қола жүлдені қамтамасыз етті.
Айта кетейік, Айбек Оралбай – әлем чемпионы (2025) және Азияның бірнеше дүркін чемпионы. Ал құрлықтық дода 10 сәуірге дейін жалғасады.