Алматыда Ермахан Ыбырайымовтың жүлдесіне арналған турнир өтеді
Жеңімпаздарға спорт шеберіне үміткер атағы беріледі
Бүгін Алматыда бокстан қыздар (жасөспірімдер мен жастар) арасында Олимпиада чемпионы Ермахан Ыбырайымовтың жүлдесіне арналған VI халықаралық турнир басталады.
20-24 ақпан аралығында жалауы желбірейтін турнир «Алматы» Олимпиадалық даярлау орталығында үздіктерді анықтайды.
Турнирге 2006-2007 және 2008-2009 жылы туған Моңғолия, Қытай, Қырғызстан, Өзбекстан, Тәжікстан және Қазақстанның әр өңірінен 200-ден аса бұрымды боксшылар қатысады. Сондай-ақ, жасөспірімдер – 13, жастар – 12 салмақ дәрежесінде өзара мықтыны анықтамақ.
Аталған халықаралық турнир түрлі елдердің бокс мектептерінің өкілдері арасында достық байланыс пен тәжірибе алмасуды нығайтуға бағытталған. Сондай-ақ, қатысушыларға өз шеберлік деңгейін, сондай-ақ олардың біліктілігін арттыруға мүмкіндік бергелі отыр. Бұдан бөлек, салмақ дәрежесі бойынша жеңімпаздарға Қазақстан Республикасының спорт шеберіне үміткер атағы беріледі.