Төрехан Сабырхан өзбек боксшысын екі рет нокдаунға жіберіп, Азия чемпионы атанды

Астанада өтіп жатқан бокстан жастар арасындағы Азия чемпионатында 67 келіде өнер көрсеткен Төрехан Сабырхан финалда өзбек боксшысын жеңді.

Түркістандық боксшы ақтық сында Өзбекстаннан келген Мухаммадазизбек Исмоиловпен жұдырықтасқан. Үш раундтың нәтижесінде төрешілер жеңісті бір ауыздан Төрехан Сабырханға берді. Осы ретте айта кету керек, үшінші раундта қазақ боксшысы өзбек қарсыласын екі рет нокдаунға жіберді.

Төрехан Сабырхан Азия чемпионатын осымен төртінші рет жеңіп отыр. Бұған дейін ол жастар арасында да, жасөспірімдер арасында да құрлық чемпионы болған.