Мұхтархан Ділдәбеков пен Алексис Рубалкаба 24 жылдан кейін рингте қайта кездесті (ВИДЕО)
2000 жылғы Сидней Олимпиадасының ширек финалында Ділдәбеков Рубалкабаны жеңіп, жарыстың сенсациясын жасаған еді
Шымкентке Мұхтархан Ділдәбеков атындағы халықаралық турнирге құрметті қонақ ретінде шақырылған Куба боксының ардагері Алексис Рубалкаба жергілікті жас боксшыларға шеберлік класын өткізді.
Сондай-ақ, бұл күні Мұхтархан Ділдәбеков пен Алексис Рубалкаба араға 24 жыл салып рингке қайта көтерілді. Қос боксшы Сидней Олимпиадасының ширек финалында жұдырықтасып, Ділдәбеков жеңіске жеткен болатын. Алайда, бұл жолы екеуі рингте тек қол алысып, ізбасарларына ақыл-кеңес айтумен шектелді.
Бұл жиынға қазақтың өзге де белгілі боксшылары келген. Олар да жастармен тәжірибе бөлісіп, бокс техникасын үйретті.
Айта кетейік, бұған дейін Алексис Рубалкаба Түркістан облысында «Алматау» базасында Сидней Олимпиадасының күміс жүлдегері Мұхтархан Ділдәбековтің турниріне құрметті қонақ ретінде қатысатыны мәлім болған еді.