Еден жуған Әлімханұлы жанкүйерлерін ойландырып қойды
Жәнібек ӘЛімханұлы қазан айында жекпе-жекке шығады
Қазан айының басында жекпе-жекке шығатын қазақстандық Жәнібек Әлімханұлы жаттығудан соң ринг еденін жуып, жанкүйерлерін таңдандырып қойды.
WBO/ІBF нұсқаларында әлем чемпионы атанған боксшы бұл әрекетін өзі ісіне жауапкершілікпен қатар, жас боксшыларға үлгі болу ниетімен жариялағанын жеткізді.
“Ринг менің екінші үйім. Жұрт мені қарапайым екен деп ойласын деп емес, жастарға бағыт болсын деп әдейі осы видеоны жүктедім. Аға болып ініге жол көрсетіп, дұрыс түсінік қалыптастыра алмасам маған сын! Чемпион болсаң да, болмасаң да өзің жаттығатын залды таза ұстау керек! Еденді жуа салу, рингті тазалай салу адамды өсірмесе, өшірмейді! Көтермесе, төмендетпейді", - деп жазды боксшы әлеуметтік желіде.
Бұған дейін боксшының менеджері Жәнібектің алдағы айда жекпе-жекке шығатынын айтқан еді. Отандасымыздың қарсыласы Жаңа Зеландия өкілі Андрей Михайлович болмақ. 14 шілдеде Лас-Вегаста жұдырықтасуы тиіс болған қазақстандық боксшының денсаулығы сыр беріп, ауруханаға түсіп қалған еді.