Александр Усик Хижнякқа Олимпиада алдында уәде еткен сыйақысын берді
Хижняк финалда қазақ боксшысы Нұрбек Оралбайды жеңген еді
Белгілі кәсіпқой боксшы Александр Усик өзінің отандасы Александр Хижнякқа Париж Олимпиадасындағы жетістігі үшін қаржылай қолдау көрсетті.
Аса ауыр салмақта WBA, WBO және WBC нұсқаларында әлем чемпионы Александр Усик украиналық боксшыға 100 мың АҚШ долларын табыстады.
«Уәде еткенімдей, тиісті соманы Олимпиада чемпионының банк картасына аудардым. Бұл біз бірге істейтін жұмыстың шамалы ғана бөлігі. Олимпиада алтыны мен үшін абсолютті әлем чемпионы атағынан да аса маңызды. Сол үшін біз Ready To Fight командасымен бірге әуесқой боксқа қолдау көрсеткіміз келеді. Біз бокстың Олимпиада бағдарламасында қалғанын қалаймыз және жемқорлықтар ада болса дейміз», - деді Усик.
Украиналық Александр Хижняк Парижде 80 келіде чемпион атанған болатын. Ол финалда қазақстандық Нұрбек Оралбайдан басым түсті.