Азия чемпионаты: бүгін Махмұд Сабырхан рингке шығады
Бұған дейін төрт боксшымыз алғашқы жекпе-жектерін жеңген
Бокстан Азия чемпионатының кезекті күні рингке Қазақстанның үш боксшысы шығады. Алуа Балқыбекованың денсаулығына байланысты жарыстан шығып қалғанын айтпағанда, отандық боксшылардың ешбірі әлі жеңілген жоқ.
54 келіге қайта оралған Махмұд Сабырхан бүгін тайбэйлік Лай Ян-Линмен жұдырықтасады. Ал, қыздар боксында Аида Әбікеева (63 кг) өзбек қызы Дильфуза Бековамен, Милана Сафронова (66 кг) тайваньдық Ли Минмен өзара мықтыны анықтайды.
Жарыс Астана уақытымен 12:00-де басталады. Жекпе-жектерді ASBC YouTube-каналынан көруге болады.
Еске салайық, бұған дейін Дулат Бекбауов (67 кг), Оразбек Асылқұлов (57 кг), Бейбарыс Жексен (60 кг) және Ұлжан Сәрсенбек (57 кг) алғашқы жекпе-жектерін жеңіп, ширек финалға жолдама алған еді.