Иван Дычкоға жекпе-жекке шығуға тыйым салынды
Ол енді Алматыдағы кешке қатыспайды
Аса ауыр салмақтағы қазақстандық кәсіпқой боксшы Иван Дычко 27 желтоқсан күні өтетін Алматыдағы кешке қатыспайды.
Дычко жарақат алып қалған, сондықтан ресейлік Виталий Кудуховқа (7-2, 3 КО) қарсы жекпе-жекке шыға алмайды. Осыған байланысты All Stars мәлімдеме жасады.
«Өкінішке қарай, спарринг кезінде Иван Дычко иығынан жарақат алды. Медициналық тексерістен кейін кәсіби бокс комиссиясы спортшыны алдағы жекпе-жекке жібермеу туралы шешім қабылдады.
Біз Иванға тезірек сауығып кетуін тілейміз және барлық жанкүйерлерге түсіністік танытқаны үшін алғысымызды білдіреміз, – делінген промоушеннің мәліметінде.
Әзірге бұл айқас қай уақытқа ауыстырылғаны белгісіз.
Қазақстандық боксшы бұған дейін шаршы алаңға тамызда шығып, Плант-Ситиде (Флорида штаты, АҚШ) өткен айқаста американдық Крейг Льюисті (15-8-1, 8 КО) екінші раундта нокаутқа жіберді.