Жәнібек Әлімханұлы үшінші белбеуді алу жоспарын келер жылға қалдырды
Қазақ боксшысы өзіне лайықты қарсылас таппай жүргенін бұған дейін айтқан
Кәсіпқой бокста орта салмақта WBO және IBF нұсқалары бойынша әлем чемпионы Жәнібек Әлімханұлы алға қойған жоспарын жариялады.
Кәсіпқой рингте бірде-бір рет жеңіліп көрмеген Qazaq Style көктемде чемпиондық атақтарын қорғамақшы.
«Менің ойымша, көктемде титулдарымды қорғаймын. Сосын Хамза Шираз – Карлос Адамес жұбының жеңімпазымен төбелесемін. Иншалла, күзде менде үш бірдей титул болады», - деп жазды Жәнібек X әлеуметтік делісінде.
Еске салайық, биыл қазан айында Жәнібек Әлімханұлы жаңазеландиялық Андрей Михайловичті нокаутпен жеңген болатын. Мұнан кейін WBO оны британдық Хамза Ширазбен жұдырықтасуға міндеттеді. Алайда, Шираз қазақ боксшысынан бас тартып, доминикалық чемпион Карлос Адаместі таңдады. Екеуі 22 ақпанда Эр-Риядта жұдырықтасады.