Александр Усиктен екі рет жеңілген Тайсон Фьюри күтпеген шешім қабылдады
Ол енді кәсіпқой мансабын аяқтамақ
36 жастағы британдық боксшы Тайсон Фьюридің үлкен спорттағы даңғылы аяқталды. Бұл туралы спортшы бейнеүндеу жариялап, кәсіби спорттағы жолын аяқтағанын жеткізді.
«Мен көп сөзге бармаймын. Боксшы ретіндегі мансабымды аяқтағанымды хабарлағым келеді. Бұл керемет кезең болды, әр минутынан ләззат алдым. Баршаңызға рақмет! Бұл таңғажайып сәттерімен ерекше есте қалды. Маған қолдау көрсеткендердің барлығына алғыс білдіремін!», – деді Фьюри.
Айта кетейік, Тайсон мансабын аяқтау туралы мұндай мәлімдемені бұған дейін де жасаған болатын. 2022 жылы Диллиан Уайтты 96 мың көрермен жиналған «Уэмблиде» жеңгеннен кейін, ол бокстан кететінін жариялап, алайда төрт айдан соң шаршы алаңға қайта оралған болатын.
Ол 2024 жылы Александр Усикпен екі мәрте кездесіп, есе жіберді. Осылайша боксшы өз мансабындағы жеңіліссіз сериясын да аяқтады.
Сонымен қатар, Сауд Арабиясындағы боксқа жауапты Турки әл-Аш-Шейх биыл Тайсон Фьюри мен Энтони Джошуа арасындағы жекпе-жекті ұйымдастыруды басты мақсаттардың бірі деп атаған болатын.