Сұлтан Зауырбек IBF рейтингінде 5-орынға көтерілді

Халықаралық бокс федерациясы (IBF) әр салмақ дәрежесі бойынша үздіктер рейтингін жариялады. Тізімде қазақ боксшылары да бар.

Мәселен, екінші орта салмақта өнер көрсететін Али Ахмедов позициясын жоғалтпай, 15-ші орнын сақтап қалды. Бұл салмақта әлем чемпионы – кубалық Уильям Скулл. Рейтингтің бірінші орны әзірге бос, екінші сатыда – Владимир Шишкин (Ресей), үшінші – Кристиан Мбилли (Франция).

Орта салмақта чемпиондық титул қазақ боксшысы Жәнібек Әлімханұлына тиесілі екені белгілі. Бірінші орын әзірге вакантты, екіншіде – Этиноса Олиха (Италия), үшіншіде – кіші Крис Юбэнк (Ұлыбритания) тұр.

Ал, екінші жартылай жеңіл салмақта шымкенттік кәсіпқой боксшы Сұлтан Зауырбек (19-0, 13 КО) өнер көрсетеді. Ол Жаңа жыл алдында ғана жекпе-жек өткізіп, жеңіске жеткен болатын. Осының арқасында болар, Сұлтан IBF рейтингінде жетіншіден бесінші орынға көтерілді. Бұл салмақтың чемпионы – Энтони Какейс (Ұлыбритания).