Әлімханұлы наурызда шаршы алаңға оралады: боксшының менеджері мәлімдеме жасады
Ол Жәнібек Әлімханұлының жекпе-жегіне қатысты тараған ақпаратты жоққа шығарды
Бокстан әлем чемпионы Жәнібек Әлімханұлының менеджері Берік Сұлтан былғары қолғап шеберінің келесі жекпе-жегіне қатысты тараған ақпаратты жоққа шығарды.
БАҚ беттерінде отандық боксшының келесі айқасы өтетін уақыт жарияланған еді. Brunch Boxing мәліметінше, IBF және WBO нұсқалары бойынша әлем чемпионы шаршы алаңға наурыз айында оралып, оның айқасы ESPN-дегі Top Rank кешінің басты оқиғасы болуы тиіс.
Сонымен қатар дереккөз Жәнібек наурыздағы кездесуінен соң орта салмақта WBA нұсқасы бойынша Эрисланди Ларамен немесе 22 ақпан күні Карлос Адамес пен Хамза Шираздың қай жеңгенімен біріктірілген айқас өткізетінін алға тартты.
«Мен де сіздер секілді бұл ақпаратты әлеуметтік желіден оқыдым. Наурыз айындағы кездесу бойынша ешқандай келіссөз жүргізіп жатқан жоқпыз. Күні мен орын белгілі, ресми келісімшарт күтіп отырмыз. Жекпе-жек наурызда болмайды», - деді Берік Сұлтан Tengri Sport-қа берген сұхбатында.
Бұған дейін Жәнібектің өзі де келесі айқасы көктемде өтетінін, сонан соң күзде үш дүркін әлем чемпионы атануды көздейтінін алға тартқан.