48 жастағы Владимир Кличко кәсіпқой боксқа қайта оралмақшы
Ол ең жасы үлкен әлем чемпионы атанғысы келеді
Кәсіпқой бокста аса ауыр салмақта өнер көрсетіп, WBA, IBF, IBO және WBO нұсқалары бойынша әлем чемпионы болған украиналық Владимир Кличко рингке қайта оралуы мүмкін. 48 жастағы спортшының басты мақсаты – даңқты Джордж Форманның рекордын жаңарту.
Бұл туралы белгілі промоутер Том Леффлер ESNEWS YouTube-каналында болған сұхбат кезінде айтты.
«Ол қазір 48-де, наурызда 49 жасқа толады. Форманның рекордың қазір тек Кличко ғана жаңарта алады. Әрине, оның қарсыласы Усик болмайды. Владимир үшін қалай ыңғайлы болатынын алдағы уақытта көреміз», - деді Леффлер.
Айта кетейік, «әлемнің ең қарт чемпионы» атағы Джордж Форманға тиесілі. Ол 1994 жылы 45 жасында аса ауыр салмақта екі бірдей чемпиондық титулға қол жеткізді (WBA және IBF).
Кличко болса соңғы рет рингке 2017 жылы шығып, британдық Энтони Джошуадан техникалық нокаутпен жеңілген болатын. Ол кәсіпқой бокста барлығы 69 жекпе-жек өткізіп, 64-де жеңіске жеткен (53 нокаут). Бесеуінде жеңілді.