The Ring Жәнібек Әлімханұлының жекпе-жегі өтетін уақытты жариялады
Алайда қарсылас әлі анықталған жоқ
Жәнібек Әлімханұлы (16-0, 11 КО) келесі жекпе-жегін 5 сәуірде Астанада өткізеді. Бокс кеші «Барыс Аренада» өтеді деген болжам бар.
Астанадағы айқаста Жәнібек өзінің чемпиондық атағын бірінше рет ерікті түрде қорғамақ. Алайда қарсылас әлі анықталған жоқ. Бұл ақпаратты The Ring растады.
«Бұл турнир Top Rank үшін ерекше кештің бөлігі болмақ. Қазақстандағы шоу сол күні Тhe Palms Casino-да (Лас-Вегас, АҚШ) өтетін іс-шараның алдында ESPN-де көрсетіледі», - деп жазады басылым.
Бұған дейін Жәнібектің жеңілмеген британиялықық Шакил Томпсонмен (13-0, 7 КО) айқасатыны туралы ақпарат шыққан, алайда бұл расталған жоқ. The Ring тараптар арасындағы келіссөздер сәтсіз аяқталғанын алға тартты.
Орта салмақта The Ring рейтингінде бірінші орында тұрған Жәнібек Әлімханұлы кәсіби мансабында Қазақстанда екі рет жекпе-жек өткізді, оның екеуі де 2017 жылы ұйымдастырылған. Содан кейін ол АҚШ-та Top Rank аясында 13 жекпе-жек өткізсе, оның соңғы айқасы Аустралияда ұйымдастырылды.