Қазақстандық танымал боксшы қыз кәсіпқой боксқа ауысып кетті
Ол әлемнің абсолютті чемпионы атануды көздеп отыр
Қыздар боксынан Азия чемпионы және әлем чемпионатының қола жүлдегері Милана Сафронова мансабын кәсіпқой бокста жалғастыратын болды. Бұл туралы ол өзінің Instagram-парақшасында жазды.
Айта кетейік, Сафронова әлем чемпионатында қола жүлдегер атанған. Сондай-ақ, Азия чемпионы және екі рет қола жүлдегері болған еді. Ол 64 келіге дейінгі салмақ дәрежесінде өнер көрсеткен.
«Мен әрдайым өз елімнің туын әлемдік ареналарды көтеруді армандайтынмын және осы мақсатыма жетуге кәсіпқой бокста да барымды саламын.
Қазір менің жаңа мақсатым – қыздар боксынан әлемнің абсолютті чемпионы атану. Алғашқы оқу-жаттығу лагері Таиландта болды, ең мықты бапкерлермен жаттықтым. Осылайша ресми түрде кәсіпқой боксқа ауыстым. Бірінші жекпе-жегімнің уақытын сіздерге қосымша айтамын. Менің ең мықты командаммен чемпиондық титулдарды Отаныма әкелуге уәде беремін», - деп жазды Сафронова әлеуметтік желіде.
Еске салайық, қыздар арасындағы кәсіпқой бокста қазіргі таңда Қазақстаннан Ангелина Лукас пен Балауса Мұздыман өнер көрсетіп жүр.