Әйгілі Дмитрий Биволдың анасы Шымкенттің тумасы болып шықты
КСРО кезінде ол білім алу үшін Ресейге, кейін Қырғызстанға қоныс аударған
Кәсіпқой бокстан жартылай ауыр салмақта әлемнің абсолютті чемпионы Дмитрий Бивол қырғызстандық Exclusive.kg порталына сұхбат беріп, оны Қазақстанмен не байланыстыратыны туралы айтты.
Боксшы Қырғызстанда дүниеге келіп, балалық шағын сонда өткізгенімен, Ресейде білім алып, бокстағы алғашқы қадамын да сол жақта бастады.
Сол үшін де Дмитрий Биволдың қай елді өз отаны санайтыны жанкүйерлер арасында жиі талқыланатын.
«Қырғызстанды өз үйім деп есептеймін. Қырғызстанда дүниеге келуімнің өзі кездейсоқтық екен. Ата-анам Бологое қаласында танысқан. Анам Қазақстанның Шымкент қаласында дүниеге келген, кейін Кеңес Одағында еркін білім алу мүмкіндігі болғандықтан, Бологоеге оқуға барыпты. Әкем Молдовада тұрған, ол да білім іздеп сонда ат басын бұрған, сөйтіп олар сол жерде танысқан. Кейін Қырғызстанға көшіп келді, өйткені ол кезде бұл үлкен біртұтас ел болатын, бір қаладан екінші қалаға, бір республикадан екінші республикаға кедергісіз баруға болатын. Қазір ондай мүмкіндік жоқ.
Мен тағдырыма ризамын, өйткені ата-анам кезінде Қырғызстанға келіп, осында отбасын құрған. Ол кезде анам әжеммен бірге Қырғызстанда тұрған. Мен де осында дүниеге келдім, менің әпкелерім де осы жерде туған», – деді спортшы.
Еске салайық, Бивол Қырғызстанның Тоқмақ қаласында туған. Ол бүгін осы өңірге келіп, жергілікті халықпен кездесті.