Жәнібек Әлімханұлының командасында неге өзге боксшы жоқ? Менеджері жауап берді
Әлем чемпионы кімдермен спарринг өткізді және жаттығу жұмыстары қайда өтті?
5 сәуірде Астанада әлемдік деңгейдегі кәсіпқой бокс кеші өтетіні белгілі. Орта салмақта IBF және WBO тұжырымдары бойынша әлем чемпионы Жәнібек Әлімханұлы (16-0, 11 KO) титулдарын қорғау үшін франциялық Анауэль Нгамиссенгемен (14-0, 9 KO) жұдырықтасады.
Осы жекпе-жек алдында Жәнібектің менеджері Берік Сұлтан дайындық жұмыстарының қалай өткені және команданың болашаққа жоспары туралы айтып берді.
– Берік мырза, Qazaq Style деген брендпен әлемді бағындырып жүрсіздер. Командаңыз бар. Бірақ, сол командада Жәнібектен өзге боксшы жоқ. Алдағы уақытта қатарға қосылатын боксшылар бола ма?
– Қазақстанның көптеген боксшысы осы мәселе бойынша хабарласып келеді. Бірақ, бізде қазір бір-ақ мақсат бар, ол – Жәнібекті абсолютті әлем чемпионы ету, яғни төрт белбеудің бәрін иелену. Бұл мақсатқа жету үшін өте көп жұмыс істеуіміз керек. Демек, күшіміздің бәрін тек Жәнібекке ғана жұмылдыра аламыз. Егер командада бірнеше боксшы болса Жәнібекке көңіл аз бөлініп, мақсатымызға жете алмай қалуымыз мүмкін. Төрт белбеуді жеңіп алайық, сосын команданы кеңейтеміз.
– Осы жекпе-жекке дайындалу үшін өз елімізде біршама уақыт дайындалдыңыздар. Қай елде жаттығу жасау қолайлы: АҚШ-та ма, Қазақстанда ма?
– Жекпе-жек қай елде өтеді, сол жерге барып жаттығу жасаймыз, дұрысы сол. Жергілікті климатқа ағза үйренуі керек. Жергілікті жердің суын ішіп, тамағын жеуіміз керек. Сонда рингте біршама жеңіл болады.
Ал, Қазақстан – біздің өз үйіміз, мұнда бәрі жеңіл, бәрі ойдағыдай. Үйренген асымызды ішіп, туып-өскен топырақта жаттығу жасау тек пайдаға ойнайды.
– Ертеңгі жекпе-жекке дайындалу үшін Жәнібек кімдермен спарринг өткізді? Шетелдіктерді алып келген боларсыздар?
– Жоқ, шетелдіктер келмеді, жергілікті боксшылар болды. Әдейі солай таңдадық. Өйткені, олар да Жәнібектен үйренсін дедік, оның үстіне Жәнібекке көмектессін дедік. Нақты айтсам, ұлттық құрама мүшелері Аман Қонысбаев пен Нұрқанат Райыс спарринг-қарсылас болды. Бұл жігіттерге тек алғыс айтамын. Ал, бұл жаттығу жұмыстарын Мырзағали Айтжанов ағамыз ұйымдастырды. Ол кісіге де алғысымыз шексіз!