4 сәуір – Бекзат Саттарханов пен Василий Жировтың туған күні
Жиров – Вэл Баркер кубогін жеңіп алған алғашқы қазақстандық боксшы
Бүгін бокстан Олимпиада чемпиондары Бекзат Саттарханов пен Василий Жировтың туған күні. Қос боксшы еліміз егемендік алғаннан кейін қатысқан Олимпиада ойындарында топ жарды.
Василий Жиров – 1996 жылы Атлантада өткен Олимпиада ойындарында 81 келіде үздік шықты. Ол сол сында үздік боксшыға берілетін Вэл Баркер кубогын да иеленді. Кейін кәсіпқой боксқа ауысқан отандасымыз IBF нұсқасында әлем чемпионы болды. Бүгінде АҚШ азаматы атанған «Балқаш барысы» бапкерлік қызметпен шұғылданады.
Бекзат Саттарханов 20 жасында Сиднейде өткен ойындарда чемпион болды. 57 келіде өнер көрсеткен боксшы Аустралияда сенсация жасады. Төртжылдықтың басты ойындарында өнер көрсеткен түркістандық спортшы 20 жасында әлемді дүр сілкіндірді. Өкінішке қарай, Бекзат Саттарханов Олимпиададан кейін үш ай өткенде жол апатынан Ордабасы ауданының орталығы Темірлан ауылының маңында қайтыс болды.