Жәнібек Әлімханұлының белбеуіне күтпеген үміткер пайда болды

Кәсіпқой бокстан IBF және WBO нұсқалары бойынша орта салмақтағы әлем чемпионы қазақстандық Жәнібек Әлімханұлының (17-0, 12 KO) келесі қарсыласы ретінде америкалық боксшы Джахай Такер (15-1-1, 6 KO) аталуда.

The Ring басылымының жазуынша, екі боксшы орта салмақтағы WBO және IBF тұжырымдары бойынша біріккен әлем чемпионы титулын сарапқа салады.

Такер жуырда отандасы Лоренцо Симпсонды (15-3, 9 KO) жеңіп, өз мансабында маңызды жеңіске қол жеткізді. Сарапшылардың пікірінше, дәл қазір ол үшін Жәнібекпен жекпе-жек өткізу ең ықтимал нұсқа болып отыр. Бұл – екі боксшының да Top Rank промоутерлік компаниясымен келісімшартта болуымен байланысты. Бұл жекпе-жектің ұйымдастырылуын жеңілдетеді.

Ал өзге чемпиондар – доминикандық Карлос Адамес (24-1-1, 18 KO) пен кубалық Эрисланди Ларамен (31-3-3, 19 KO) кездесулерді ұйымдастыру логистикалық және келісім жағынан қиынға соғады.

Айта кетейік, Жәнібек Әлімханұлы соңғы жекпе-жегін 2025 жылғы 5 сәуірде Астанада өткізіп, француз боксшысы Анауэль Нгамиссенгені (14-1, 9 KO) 5-раундта нокаутпен жеңген болатын.