Құлыбаевқа қастандық жасамақ болды деп сотталған Головкиннің бапкері бостандыққа шықты

Серік Қалиев 2004 жылы елдің тұңғыш президент Нұрсұлтан Назарбаевтың құдасы Асқар Құлыбаевқа қастандық жасамақ болды деген айыппен сотталған. Ол өз кінәсін мойындамайды, деп хабарлайды 1bol.kz Orda.kz сайтына сілтеме жасап.

Дау-дамайға толы істің басты кейіпкері кеше бостандыққа шықты. Заречныйдағы қатаң режимдегі колония қақпасынан оны туған-туыстары қарсы алды. Олар Қалиевті Алматыға алып кетті. Адвокат Айман Омарованың айтуынша, ол өзін «тозақтан қайтып келгендей» сезінеді.

«Серік 22 жыл түрмеде отырды. Осы уақыт ішінде ол ұлы мен немерелерінің өскенін көре алмады. Бірақ адам төзгісіз қиындықты бастан өткерді. Түрмеде С гепатитін жұқтырып, түрлі созылмалы ауруларға шалдықты. Сол себепті кейбір адамдар оның бостандыққа шығуын әдейі кешіктірді», – деді адвокат.

Кезінде республикалық және халықаралық деңгейдегі жарыстарды ұйымдастырып, қайырымдылықпен айналысқан, халықаралық дәрежедегі спорт шебері, Әуесқой бокс федерациясы қауымдастығының вице-президенті болған адамға кім және не үшін қастандық жасағысы келді?

Серік Қалиев кезінде Геннадий Головкин, Серік Сәпиев, Василий Жиров, Серік Елеуов пен Павел Сторожук сынды танымал боксшыларды жаттықтырған.

Мұндай абырой мен бедел өмір бойына жететіндей көрінетін. Алайда бәрі 2004 жылдың мамыр айында өзгерді. Алматы полициясы Қалиевті қала орталығында жарылыс ұйымдастырды деген күдікпен ұстады.

Қастандықтың нысанасы — оның сол кездегі басшысы, бокс федерациясының президенті Асқар Құлыбаев еді. Сол кездегі ақпарат құралдары бұл істі кеңінен жариялады. Себебі жәбірленуші — Тимур мен Талғат Құлыбаевтардың әкесі. Тимур — сол кездегі президенттің ортаншы қызы Динараның жұбайы, ал оның ағасы Талғат — Жамбыл облыстық ІІД-нің басшысы, полиция генералы болған.

Жарылғыш зат бейнекассета кейпіне жасырылған. Оны Silk Way Group ғимаратының кіреберісіне Ақмола облысының 30 жастағы тұрғыны Михаил Нартов әкелген. Жарылыс Асқар Құлыбаев ғимараттан шығып, көлікке мінгелі жатқанда, небәрі он метр қашықтықта болған. Нартов оқиға орнында қаза тапқан. Алайда ол қайтыс болар алдында тапсырыс беруші мен делдалдың атын атауға үлгергені туралы ақпарат тарады. Олар — Серік Қалиев пен оның жүргізушісі Андрей Песков деп көрсетілген.

2004 жылдың 21 мамырында Қалиев пен Песковқа Нартовты өлтірді, Құлыбаевқа қастандық жасады, бопсалады және заңсыз қару мен оқ-дәрі сақтады деген айып тағылды.

2005 жылдың 23 мамырында Алматы қалалық соты айыпталушыларды кінәлі деп танып, қылмыстар жиынтығы бойынша әрқайсысын 25 жылға бас бостандығынан айырды. Кейін қорғаушылар жаза мерзімін үш жылға қысқартуға қол жеткізді. Қалиев өз кінәсін әлі күнге дейін мойындамай келеді.

Серік Қалиев жазасының басым бөлігін Степногорск пен Атбасардағы түзеу мекемелерінде өтеді. Тек бірнеше ай бұрын туыстары оны Алматы облысына ауыстыруға қол жеткізген.

Адвокатының айтуынша, ол түрмеде азапталған, ал жазасын жеңілдету бағытында жасалған барлық заңды әрекеттер нәтиже бермеген.

«Серік он рет шартты түрде мерзімінен бұрын босатуды сұрап, сотқа жүгінді. Алайда сот әрдайым бас тартты. Олар оның түзелгенін дәлелдейтін нақты айғақтар жоқ деген уәж келтірді», – дейді Айман Омарова.