Виктор Кумыков «Тұранның» бас бапкері атануы мүмкін
Ол бұған дейін «Қайсарды» жаттықтырған.
62 жастағы ресейлік тәжірибелі маман Виктор Кумыков түркістандық «Тұран» футбол клубының жаңа бас бапкері атануы ықтимал. Бұл туралы инсайдер Эльдар Аманбаев өзінің Telegram-парақшасында жазды.
«Клуб басшылығы жаңа маусым алдында «Қайсардың» бұрынғы бас жаттықтырушысын шақыру мәселесін қарастырып отыр. Өткен маусым «Тұран» үшін сәтсіз аяқталды – команда Қазақстан Премьер-лигасынан шығып қалды. Ал Кумыков тек қазақстандық футболшылармен-ақ чемпионатты 11-орынмен тәмамдады.
Бұл жайт ресейлік маманның қазақстандық футболдың ішкі нарығын жақсы білетінін, сондай-ақ шектеулі ресурспен де нәтижеге қол жеткізе алатынын аңғартады. Осы факторлар «Тұран» басшылығы үшін шешуші рөл атқаруы мүмкін.
Алайда бір маңызды құқықтық нюанс бар. Егер Бірінші лига клубтарына шетелдік мамандардың ресми түрде бас бапкер болуына тыйым салатын регламент сақталса, де-юре команданың бас жаттықтырушысы қызметіне қазақстандық маман Олег Корниенко тағайындалуы ықтимал. Ал Виктор Кумыков ресми түрде көмекші ретінде тіркелгенімен, іс жүзінде команданың спорттық бағыты мен дайындығын өзі басқаруы мүмкін.
Қалай болғанда да, Кумыковтың Түркістанға келуі «Тұранның» жоғары лигаға қайта оралуға деген мақсатының бар екенін көрсететін маңызды сигнал болмақ», - деп жазды ол.