Нығматулиннің экс-құдасы «Тұран» клубын сатып алуы мүмкін
Қазіргі таңда мәміле параметрлері мен оның клубты басқарудағы ықтимал рөлі пысықталуда.
Футболға жақын дереккөздердің мәліметінше, қазақстандық кәсіпкер Дінмұхаммед Ыдырысов Түркістан қаласының «Тұран» футбол клубының иесі атану мүмкіндігін қарастырып жатыр.
Қазіргі уақытта ықтимал мәміленің шарттары мен кәсіпкердің клуб басқаруына қатысу форматы талқылануда. Егер тараптар келісімге келсе, «Тұран» жақын уақытта жаңа жекеменшік инвесторға ие болуы мүмкін.
Бұл клуб үшін қаржылық тұрақтылықтың артуына, жобаның жаңа кезеңге өтуіне, сондай-ақ басқару жүйесі мен даму стратегиясында өзгерістер болуына жол ашуы ықтимал.
Әзірге тараптар ресми мәлімдеме жасаған жоқ. Соған қарамастан, футбол ортасында бұл тақырып барған сайын жиі талқыланып жатыр.
Telegram желісіндегі BAD FOOTBALL арнасының хабарлауынша, Дінмұхаммед Ыдырысов «Тұран» клубын сатып алу мүмкіндігін қарастырып отыр. Қазіргі таңда мәміле параметрлері мен оның клубты басқарудағы ықтимал рөлі пысықталуда.
Еске салайық, «Тұран» 2025 жылғы маусым қорытындысы бойынша Қазақстан Премьер-лигасында 16 ұпай жинап, соңғы орын алған еді. Осы нәтижеден кейін команда жоғары дивизионнан шығып қалып, сатылымға қойылған.
Ал Forbes Kazakhstan журналының соңғы деректеріне сәйкес, Дінмұхаммед Ыдырысов Қазақстанның ең бай 75 бизнесменінің тізімінде 18-орында тұр. Оның активтері шамамен 563 миллион доллар деп бағаланады.
Дінмұхаммед Ыдырысов – банк, телекоммуникация, тау-кен өндірісі және коммуналдық қызмет көрсету салаларында активтері болған қазақстандық ірі кәсіпкерлердің бірі.
Ол бұрын Мәжілістің экс-спикері Нұрлан Нығматулинмен құда болған. Кәсіпкер Ыдырысовтың қызы Мәдина Нығматулиннің ұлы Нұрхан Нұрлановқа тұрмысқа шыққан. Қазіргі таңда қолда бар мәліметтерге сәйкес, олар ажырасқан.