Қазақстан құрамасы Тәжікстан футболшыларынан оңбай ұтылды

Қырғызстанның Бішкек қаласында өтіп жатқан International Talents Cup турнирінде Қазақстанның 16 жасқа дейінгі жасөспірімдер құрамасы үшінші ойынын өткізді.

Ерлен Бекмұхаев шәкірттері бұл кездесуде Тәжікстан құрамасымен кездесті. Қазақстандықтардың бастапқы құрамы: Мирахматов, Турищев, Тоқтасын, Қаси, Әбжапар, Салимов, Дутпаев, Сарсымбаев, Зару, Маратов, Асан.

Ойынның алғашқы минуттары қазақстандықтар үшін сәтсіз басталды – қарсылас 10-минутқа дейін екі гол соғып үлгерді. Ал 38-минутта есеп 3:0-ге жетті. Дегенмен бірінші таймның соңына таман Мирас Салимов есеп айырмасын қысқартты.

Екінші таймда тәжікстандық футболшылар тағы екі рет мергендік танытып, есепті 5:1-ге жеткізді. Қазақстан сапынан Тамерлан Сарсымбаев бір голмен жауап қатты. Қорытынды есеп – 5:2, Тәжікстан құрамасының пайдасына.

Айта кетейік, бұған дейін Қазақстан U-16 құрамасы турнирдегі алғашқы ойында Өзбекстанды 1:0 есебімен жеңсе, екінші матчта дәл осындай есеппен Қырғызстан құрамасына жол берген еді.