Абдукодир Хусанов қағып кеткен оператор ауруханаға түсті
Өзбекстан – Колумбия матчында оператор ауруханаға жеткізілді
2026 жылғы футболдан әлем чемпионатының алғашқы турында Өзбекстан мен Колумбия құрамалары арасындағы матч кезінде күтпеген жағдай орын алды. Кездесу барысында өзбекстандық қорғаушы Абдукодир Хусанов телетрансляция операторын қағып кетіп, салдарынан маман медициналық көмекке мұқтаж болды.
Оқиға матчтың 32-минутында тіркелді. Хусанов колумбиялық шабуылшы Луис Диаспен доп үшін талас кезінде алаң шетіне қарай екпіндей жүгіріп, жылдамдығын тежей алмай қалған. Нәтижесінде ол ойын алаңының жанында тұрған операторға соғылған.
Жергілікті ақпарат көздерінің хабарлауынша, оқиғадан кейін медициналық қызметкерлер дереу араласып, зардап шеккен маманға алғашқы көмек көрсеткен. Оператордың маңында камералар мен басқа да техникалық жабдықтардың шашылып қалғаны байқалған.
Кейінірек оператордың аяғынан жарақат алғаны белгілі болды. Ол алаңнан өздігінен кете алмағандықтан, қызметкерлердің көмегімен жедел жәрдем көлігіне жеткізіліп, қосымша тексеруден өту үшін ауруханаға жіберілген.
Ал Луис Диасқа қарсы ереже бұзғаны үшін матчтың бас төрешісі Энтони Тейлор Абдукодир Хусановқа сары қағаз көрсетті.
Айта кетейік, бұл матч Өзбекстан құрамасының әлем чемпионаттары тарихындағы алғашқы ойыны болды. Кездесу Колумбия құрамасының 3:1 есебімен жеңісімен аяқталды. Ал өзбекстандықтардың әлем чемпионаттарындағы алғашқы голын Аббосбек Файзуллаев соғып, ел футболының тарихына енді.