Каннаваро бастаған Өзбекстан құрамасы Колумбиядан жеңілді
Өзбекстан әлем чемпионатындағы дебюттік матчын өткізді
Футболдан Өзбекстан ұлттық құрамасы 2026 жылғы әлем чемпионатындағы дебюттік кездесуінде Колумбия құрамасына есе жіберді.
Кездесу Мексиканың астанасы Мехикодағы әйгілі «Ацтека» стадионында өтіп, К тобының алғашқы туры аясында ұйымдастырылды. Бұл матч Өзбекстан құрамасының әлем чемпионаттары тарихындағы тұңғыш ойыны ретінде тіркелді.
Тартысты өткен кездесуде колумбиялықтар 3:1 есебімен жеңіске жетті. Жеңімпаздар сапында Даниэль Муньос 40-минутта есеп ашса, Луис Диас 65-минутта командасының басымдығын арттырды. Ал матчқа соңғы нүктені қосымша уақыттың тоғызыншы минутында Хаминтон Кампас қойды.
Өзбекстан құрамасының әлем чемпионаттарындағы алғашқы голының авторы Аббосбек Файзуллаев атанды. Ол 60-минутта капитан Эльдор Шомуродовтың соққысынан кейін қайтқан допты қақпаға дәл бағыттап, тарихи нәтижеге қол жеткізді.
Осы жеңістің арқасында Колумбия құрамасы үш ұпаймен К тобында көш бастады. Ал Португалия мен Конго Демократиялық Республикасы құрамалары арасындағы кездесу 1:1 есебімен аяқталып, екі команда бір-бір ұпайдан еншіледі. Өзбекстан әзірге ұпайсыз қалып, топтың соңғы сатысына орналасты.
Фабио Каннаваро жаттықтыратын Өзбекстан құрамасы келесі ойынын 23 маусым күні Португалияға қарсы өткізеді. Матч Қазақстан уақытымен сағат 22:00-де басталады.