Әлем чемпионатынан кейін Норвегия ФИФА-ға шағым түсірмек

Норвегия футбол қауымдастығы (NFF) 2026 жылғы әлем чемпионатында АҚШ құрамасының шабуылшысы Фоларин Балогунның дисквалификациясының күшін жою туралы шешімге байланысты ФИФА-ның Әдеп комитетіне ресми шағым түсіретінін мәлімдеді.

The Times басылымының мәліметінше, NFF президенті Лисе Клавенесс бұл шешім футболдағы әділдік қағидаттарына нұқсан келтіргенін айтты.

«Ережелер осылайша бұзылатын болса, бұл бүкіл спортқа қауіп төндіретін қауіпті үрдіске жол ашады. Ойынның негізгі қағидаттарына күмән келтірілуі – алаңдатарлық жағдай», – деді Клавенесс.

Оның айтуынша, бұл мәселе 6 тамызда өтетін NFF директорлар кеңесінің отырысында қаралады.

Еске салайық, Балогун әлем чемпионатының 1/16 финалында Босния және Герцеговинаға қарсы кездесуде тікелей қызыл қағаз алып, 1/8 финалдағы Бельгиямен ойыннан шеттетілуі тиіс еді. Алайда АҚШ президенті Дональд Трамп ФИФА президенті Джанни Инфантиноға телефон шалып, шешімді қайта қарауды сұрағаннан кейін ұйым дисквалификацияның күшін жойды.

ФИФА бұл шешімді Тәртіп кодексінің санкцияларды толық немесе ішінара тоқтата тұруға мүмкіндік беретін 27-бабымен түсіндірді. Алайда бұл қадам УЕФА тарапынан да, футбол сарапшылары тарапынан да қатаң сынға ұшырады.

Айта кетейік, Балогун ойынға қатысқанына қарамастан, АҚШ құрамасы 1/8 финалда Бельгиядан 1:4 есебімен жеңіліп, турнирмен қоштасты.