Англияның 200 гол соққан сұрмергені Сәтпаевтың клубына қосылды

Англия құрамасы мен «Лестердің» бұрынғы шабуылшысы Джейми Варди мансабын «Бернлиде» жалғастырады. Осылайша, әйгілі футболшы Қазақстан құрамасының ойыншысы Дастан Сәтпаевпен бір командада өнер көрсететін болды.

«Бернлидің» ресми мәліметінше⁠, 39 жастағы шабуылшымен келісімшарт 2026/2027 жылғы маусымның соңына дейін жасалған. Варди ағылшын клубына еркін агент ретінде қосылды.

Тәжірибелі форвард өткен маусымды Италияның «Кремонезе» клубында өткізді. Ол А сериясында 29 матчқа қатысып, жеті гол соқты. Енді Варди бір жылдан кейін Англия футболына қайта оралып отыр.

Шабуылшы мансабының ең жарқын кезеңін «Лестерде» өткізді. Ол клуб сапында 500 матчқа қатысып, 200 гол соқты. Варди 2015/2016 жылғы маусымда «Лестердің» Англия чемпионы атануына елеулі үлес қосып, кейін командамен бірге Англия кубогы мен Суперкубогын да жеңіп алды.

Вардидің мол тәжірибесі маусымды сәтсіз бастаған «Бернлиге» көмектесуі мүмкін. Команда Чемпионшиптің алғашқы бес турында жеңіске жете алмай, екі ұпаймен турнир кестесінің соңғы орнында келеді.

Ал 18 жастағы Дастан Сәтпаев «Бернлиде» «Челсиден» жалға алу келісімі бойынша өнер көрсетіп жүр. Қазақстандық шабуылшы жаңа командасында төрт матч өткізіп, «Мидлсброға» қарсы кездесудің үздік ойыншысы атанған еді. Қазір ол жарақатына байланысты бірнеше аптаға қатардан шығып қалды.

Вардидің келуі «Бернлидің» шабуыл шебіндегі бәсекені арттыра түспек. Сонымен бірге Англия футболының барлық деңгейінен өткен тәжірибелі форвардпен бірге жаттығу жас футболшы Дастан Сәтпаев үшін пайдалы мектеп болмақ.