Джанни Инфантино FIFA президенттігіне төртінші рет сайланбақ
FIFA президенттігіне әзірге бір ғана үміткер бар
FIFA ұйымның қазіргі президенті Джанни Инфантиноның 2027 жылы өтетін сайлауға қатысатынын растады. 56 жастағы функционер әлемдік футболды басқаратын ұйымның жетекшілігінде тағы бір мерзімге қалуға ниетті.
Президент сайлауы 2027 жылдың наурызында өтетін FIFA конгресі кезінде ұйымдастырылады. Ұйым өкілінің мәлімдеуінше, Инфантиноның бұған дейін жариялаған шешімі өзгермеген.
«Президент сәуір айында қайта сайлауға түсетінін мәлімдеген болатын. Оның бұл ұстанымы өзгерген жоқ», — делінген FIFA мәлімдемесінде.
Инфантино кейінгі уақытта ұйым турнирлеріндегі үлестің 20 пайызын жеке инвесторларға сату жөніндегі даулы бастамасына байланысты сынға ұшырады. Әлем чемпионатын да қамтыған жоба футбол қауымдастығының қарсылығынан кейін шілде айында тоқтатылды.
Аталған бастамаға UEFA, Азия футбол конфедерациясы және КОНКАКАФ қарсы шыққан. Соған қарамастан, Инфантино Африка және Оңтүстік Америка футбол конфедерацияларының қолдауына ие. Оның айтуынша, 200-ден астам ұлттық федерация алдағы сайлауда кандидатурасын қолдауға дайын.
Қазіргі уақытта FIFA президенттігіне Инфантинодан басқа бірде-бір үміткер ресми түрде тіркелген жоқ.
Джанни Инфантино FIFA-ны 2016 жылдан бері басқарып келеді. Ол 2019 және 2023 жылдары ұйым президенті қызметіне қайта сайланған.