EURO-2024: ширек финалға шыққан алғашқы команда анықталды
Еуропа чемпионатының соңғы чемпиондары жарыс жолынан шығып қалды
Футболдан Еуропа чемпионатының плей-офф кезеңі сенсациямен басталды. Финалдық кезеңнің алғаш матчы Швейцария – Италия арасында өтіп, Еуропа чемпиондарының жеңілісімен аяқталды.
Топтық кезеңде де сәтті өнер көрсеткен Швейцария құрамасы ойын бастала салысымен сауатты ойын өрнегін көрсетті. Нәтижесінде 37-минутта жартылай қорғаушы Ремо Фройлер есеп ашса, екінші тайм бастала салысымен Рубен Варгас (46-минут) таблодағы көрсеткішті 2:0-ге жеткізді.
Жеңіліп жатқаннан кейін Италия құрамасы шабуылды күшейтуі керек еді. Алайда, «Скуадра адзурра» 90 минут бойы қақпаға небәрі бір-ақ рет дәл тепті.
Енді Швейцария ширек финалда Англия – Словакия жұбының жеңімпазымен кездеседі. Италиялықтар үйге қайтуға мәжбүр.