«Силькеборг» Рамазан Оразовтың «кесірінен» еурокубоктік турнирден шығып қалды

Қазақстандық жартылай қорғаушы Рамазан Оразов өнер көрсететін «Силькеборг» командасы Еуропа лигасынан «ұшып» кетті. Команда іріктеу кезеңінен әрі аса алмаған. 

«Силькеборг» өз алаңында «Мольдемен» кездескен болатын. Тіпті, 3:2 есебімен де жеңді. Алайда, қос ойынның қорытындысында келесі кезеңге өте алмады. Өйткені, алғашқы матч 1:3 есебімен аяқталған еді.

Айта кету керек, Рамазан Оразов негізгі құрамда алаңға шыққан жоқ. Бас бапкер оны тек 73-минутта ойынға қосты. Қазақстандық жартылай қорғаушы шыққаннан 2 минут өткен соң гол соққан. Алайда, төреші голды есепке алмады (оффсайд). Есесіне, 78-минутта Оразов «қызыл қағаз» алып алаңнан қуылды.

Бір ойыншысы алаңнан кеткеннен кейін «Силькеборг» өз қақпасына бір гол жіберіп алды және бір гол соқты. Осылайша, Оразовтың командасы Еуропа Лигасындағы жорығын аяқтады.