Шушеначев Ресейдегі алғашқы голын соқты

«Сочи» клубының қазақстандық шабуылшысы Артур Шушеначев Ресей кубогының ширек финалының бірінші кезеңінде мергендігімен көзге түсті.

Жерлесіміздің командасы Махачкаланың «Динамосымен» кездесіп, 1:0 есебімен жеңіске жетті. Ал ойындағы жалғыз голды қазақстандық Артур Шушеначев соқты.

Ол матчтың 45-минутында қақпаны дәл көздеді. Артур бірінші тайм аяқталар тұста «Динамо» қақпашысы Тимур Магомедовпен жеке дара қалып, айласын асырып кетті.

Айта кетейік, Шушеначевтің клубы Бірінші лигада, ал «Динамо» премьер-лигада ойнайды.

Шушеначев «Сочи» сапында бұған дейін де екі рет гол соққан, дегенмен кейіннен оның екеуі де автогол ретінде қарсылас команданың ойыншыларына жазылды. Осылайша, жерлесіміз үшінші мүмкіндігін тиімді пайдаланды.

Артур ресейлік клуб сапында 11 матч өткізді. Ол мұнда Израильдің «Хапоэлінен» (Беэр-Шева) жалға беру құқығымен ауысқан.