Винисиус Жуниор FIFA нұсқасы бойынша жылдың ең үздік ойыншысы атанды

Катар астанасы Дохада The Best FIFA Football Awards 2024 сыйлығын табыстау рәсімі өтті. 

Ерлер арасында жылдың үздік ойыншы номинациясы Бразилия құрамасы мен Мадридтің «Реал» командасының шабуылшысы Винисиус Жуниорға бұйырды. Жеңімпаздың сыйлығын FIFA президенті Джанни Инфантино табыстады. 

Жуниор өткен маусымда Испанияның Ла лигасы мен Суперкубогын және Чемпиондар лигасын жеңіп алған. Ол сондай-ақ, Чемпиондар лигасының финалында «Боруссия» қақпасына гол соққан болатын.  

Бразилиялық футболшы негізі «Алтын доптың» басты фавориті саналған еді. Бірақ қазан айында Парижде өткен марапаттау рәсімінде бұл награда «Манчестер Сити» жартылай қорғаушысы Родриге бұйырды.

Әйелдер арасында жылдың үздік ойыншысы атағы Айтана Бонматиға бұйырды. Ол былтыр төрт турнирде топ жарған.

Өзге номинациялар бойынша жеңімпаздар:

• FIFA Men's Coach 2024 – ерлер командаларының үздік бапкері: Карло Анчелотти (Италия, «Реал» Мадрид);
• FIFA Men's Goalkeeper 2024 – ерлер арасындағы үздік қақпашы: Эмилиано Мартинес (Аргентина, «Астон Вилла»);
• FIFA Puskas Award 2024 – ерлер арасындағы үздік гол: Алехандро Гарначо (Аргентина, «Манчестер Юнайтед»), «Манчестер Юнайтед» пен «Эвертон» арасындағы матч;
• FIFA Fan Award 2024 – үздік жанкүйер: Гильерме Гандра Моура (Бразилия);
• FIFA Fair Play Award 2024 – адал ойын үшін сыйлық: Тиаго Майя (Бразилия);
• FIFA Women's Player 2024 – әйелдер арасындағы үздік ойыншы: Айтана Бонмати (Испания, «Барселона»);
• FIFA Women's Coach 2024 – әйелдер командаларының үздік бапкері: Эмма Хейз (Англия, «Челси» / АҚШ құрамасы);
• FIFA Women's Goalkeeper 2024 – әйелдер арасындағы үздік қақпашы: Алисса Нае (АҚШ, «Чикаго Ред Старс»);
• FIFA Marta Award 2024 – әйелдер арасындағы үздік гол: Марта (Бразилия), Бразилия мен Ямайка арасындағы матч.

Сонымен қатар жылдың таңдаулы құрамы жарияланды:

Эмилиано Мартинес, Вильям Салиба, Рубен Диаш, Антонио Рюдигер, Даниэль Карвахаль, Тони Кроос, Родри, Джуд Беллингем, Винисиус Жуниор, Эрлинг Холанд, Ламин Ямаль.