Өзбекстандықтар Еуропаны жаулап жатыр
Испаниялық ұжым өзбек футболшысын 100 мың еуроға сатып алған
Ташкенттің «Локомотив» клубы мен Өзбекстанның жасөспірімдер құрамасының жартылай қорғаушысы Лазизбек Мирзаев Испанияның «Леганес» клубына ауысты.
Келісімшарттың мән-жайы әлі айтылған жоқ, дегенмен испаниялық ұжым өзбек футболшысын 100 мың еуроға сатып алғаны туралы ақпарат бар. Ал сарапшылар оны 350 мың еуроға бағалаған еді.
18 жастағы футболшы Испаниядағы жорығын жастар командасынан бастайды деген тұжырым бар. Негізі Лазизбектің Ташкент ұжымымен келісімшарты 2025 жылғы 31 желтоқсанға дейін жасалған еді.
2023 жылғы U-17 әлем чемпионатында Лазизбек Мирзаев Өзбекстан құрамасының капитаны болды. Ал 1/8 финалда Англияға қарсы ойында ол (2:1) шешуші голды соқты. Команда ширек финалда Франциядан ұтылды.
Сондай-ақ Англияның «Манчестер Сити» клубы Абдуқодир Хусанов бойынша «Ланспен» келіссөз бастағанын хабарлады.