«Ордабасы» үй ойындарын Шымкентте емес, Түркістанда өткізетін болды

Футболдан Қазақстанның экс-чемпиондары «Ордабасы» клубы үйдегі ойындарын әдеттегідей Шымкенттемес, Түркістанда өткізетін болды. Бұл туралы Meta-ratings.kz жазды.

Шымкенттегі «Қажымұқан» атындағы орталық стадион күрделі жөндеу жұмыстарына жабылғандықтан, «Ордабасы» қонақ командаларды «Түркістан Аренада» қабылдайды. Бұл стадионда сондай-ақ, «Тұран» клубы да үй матчтарын өткізеді. Бұған дейін қос команда Шымкенттің стадионын ортақ пайдаланған еді.

Айта кету керек, «Ордабасы» биыл Конференция лигасында өнер көрсетеді. Шымкенттік клубтың еуропалық қонақтармен қай алаңда ойнайтыны әлі шешілген жоқ.

Еске салайық, «Астана» командасы да биылдан бастап өз стадионы – «Астана Аренаға» оралды. Нысан көшпенділер ойынынан кейін күрделі жөндеуден өткен. Жөндеу жұмыстарына бюджеттен 15 млрд теңге жұмсалыпты. Шымкенттегі стадионға жергілікті әкімдік қанша теңге жарататыны әзірге белгісіз.