«Тобыл» ойыншысы Қазақстан мен Ресей футболшыларының жалақысын салыстырды
Ол ресейлік топ-клубтар әлдеқайда көп табыс табатынын айтады
«Тобыл» қорғаушысы Иван Миладинович «РБ Спорт» басылымына берген сұхбатында Қостанайда өмір сүру Ресей мен Сербиядан қарағанда анағұрлым арзан екенін айтты.
Сонымен қатар ол ресейлік топ-клубтар ҚПЛ командаларына қарағанда әлдеқайда көп табыс табатынын да қоса кетті.
– Ресей мен Қазақстандағы өмірді салыстырсақ, қай жақта өмір сүру қымбатырақ?
– Меніңше, Сербия мен Ресейге қарағанда Қостанайда өмір сүру әлдеқайда арзан. Мен Сочиде тұрдым, ол Ресейдегі ең қымбат қалалардың бірі. Туристік орын болғандықтан, бағалар ұшып кетеді. Сербия мен Қазақстанға қарағанда Мәскеуде де қымбат.
– Ресей мен Қазақстан футболшыларының жалақысында айырмашылық үлкен бе?
– Әркім өзіне қолайлы жағдайға келіседі ғой. Бірақ Қазақстанда «Спартак», «Динамо», «Локомотив», ЦСКА-дағыдай жалақы жоқ. Ресейде футболшылар шынымен де көп табады. Бірақ қазақстандық футболшылар РПЛ туралы ғана армандайды деп айта алмаймын. Әрине, Ресейге кеткісі келетіндер бар. Бірақ Еуропада бақ сынағысы келетіндер де аз емес.