Роналдо қазақ футболшысын Испания чемпионатының төменгі дивизионына түсіріп тастады
Оған ойын тәжірибесі жетіспейді деген шешім шығарылған
Испаниялық «Реал Вальядолид» клубының сапында болған қазақ футболшысы Мұхамед Еңсебаев төртінші дивизиондағы клубта ойнайтын болды.
Семейлік футболшы Испанияға былтыр сәуір айында көшіп барған еді. Ол «Реал Вальядолид» бапкерлерін қызықтырып, сонда қалып қойған. Алайда, клуб басшылары Еңсебаевқа ойын тәжірибесі керек деп, оны төртінші дивизиондағы «Сеута Б» клубына жалға берді. Маусым соңына дейін ол аталған команда сапында өнер көрсетеді.
Мұхамед Еңсебаев бұған дейін «Елімай» сапында ойнап, Бірінші лиганың чемпионы атанды. Ол сондай-ақ, Қазақстанның жастар мен жасөспірімдер құрамасында да өнер көрсетті.
Айта кету керек, «Реал Вальядолид» клубына Бразилияның әйгілі футболшысы Роналдо иелік етеді. Команда Ла Лигада өнер көрсеткенімен, турнир кестесінің соңғы орнында келеді, яғни келер маусымда Сегунда дивизионына төмендеуі әбден ықтимал.
Клуб өзге қазақстандық футболшы Бақтиер Зайнутдиновке қызығушылық танытқанын бұған дейін жазғанбыз. Испандықтар оны «Бешикташтан» жалға алмақшы. Алайда, стамбұлдық ұжым қазақстандық үшін 5 млн еуро сұрап отыр.