Өзбекстан футболшылары маңызды жеңіске жетіп, Азия кубогінің плей-офф кезеңіне шықты
17.02.2025, 00:05
Алда оларды азулы Иран құрамасы күтіп тұр
instagram.com/uzbekistanfa
Футболдан Өзбекстанның 20 жасқа дейінгі құрамасы Азия кубогінің плей-офф кезеңіне жолдама алды. Топтық кезеңде өзбек жастары Индонезия құрамасымен кездесіп, 3:1 есебімен сенімді жеңіске жетті.
Бірінші таймда командалар бір-бір голдан соқты. Алдымен Өзбекстан сапынан Мухаммадали Уринбаев есеп ашса (21-минут), араға екі минут салып Йенс Равен таразы басын теңестіріп кетті.
Екінші тайм басталған тұста Абдугафур Хайдаров (47-минут) өзбектерді алға шығарды. Ал, 63-минутта Сайдумархон Саиднуруллаев үшінші голды соғып, матчтағы нүктені қойды.
19 ақпанда Өзбекстан C тобындағы бірінші орын үшін Иран құрамасымен ойнайды. Қос команда да алты ұпайдан еншілеп, плей-офф жолдамасының мәселесін шешіп тастаған.