Болат Есмағамбетов: «Реал» Алматыға жеке ұшақпен келеді, демалатын жері де ыңғайлы
Енді сол арман шындыққа айналды.
– Аға, кеше Чемпиондар лигасының жеребесі тартылды. Бұл жеребе «Қайратқа» қаншалықты сәтті болды деп ойлайсыз?
– Чемпиондар лигасында оңай қарсылас болмайды. Мұнда тек мықтылар ойнайды. Сол себепті «Қайраттың» осындай деңгейдегі клубтармен кездесуі – үлкен тәжірибе. Біздің футболшылар мен бапкерлер үшін де қуанышты жағдай. Себебі дәл осындай алып клубтармен ойнау – кез келген спортшының арманы. Өз басым мықтылармен ойнаған жөн деп санаймын. Бұл үлкен сынақ әрі үлкен мүмкіндік.
– Жұртшылықтың бәрі «Алматыға «Реал Мадрид» келеді» деп қуанып жатыр. Бір қарағанға, тарихи оқиға. Бірақ «корольдік клубтың» елімізге ат басын бұруы қазақ футболына нақты не береді?
– Әсері міндетті түрде болады. Қазір қараңызшы: жастардың бәрі әлеуметтік желіде – Instagram, YouTube, TikTok-та осы жаңалықты талқылап жатыр. Бұл дегеніміз – жасөспірімдер футболға қызығып, спортқа бет бұрады деген сөз. Әлемнің ең мықты командалары Қазақстанға келіп ойнаса, елімізді бұрын «Қазақстан қайда орналасқан?» деп білмейтіндер де тани бастайды. Бұл – футболымыздың танымалдылығын арттыратын үлкен жарнама.
Тағы бір маңызды нәрсе – осындай ойындар инфрақұрылымның дамуына да серпін береді. Президентіміз де «стадиондар салу керек, балаларға арналған футбол алаңдарын көбейту керек» деп жиі айтып жүр ғой. Осындай тарихи матчтар сол бастамаларға дем береді.
«Реал» – дүниежүзіндегі ең мықты әрі ең бай клубтардың бірі. Бұрын Қазақстанға мұндай деңгейдегі командалар келеді деп ешкім ойлаған жоқ. Енді сол арман шындыққа айналды. Бұл – біздің футболға жаңа импульс береді.
– Бірақ Испанияда кейбіреулер «6500 шақырымдық алыс сапар қиынға соғады» деп реніш білдіріп жатыр екен. Бұған не дейсіз?
– Шынын айтқанда, бұл соншалықты үлкен мәселе емес. «Реалдың» жағдайы жасалған: жеке ұшақпен келеді, демалатын жері де ыңғайлы. Ұйықтап келіп, дайындықтарын жалғастыра береді. Футболшылар үшін алыс сапарға ұшу – қалыпты жағдай. Әрине, адам болған соң барлығымыз жақын жерді қалаймыз. Бірақ кәсіби спортшылар мұндайға үйренген. Сондықтан ешқандай қиындық болмайды деп ойлаймын.