«Барыс» қатарынан екінші жеңісіне қол жеткізді

Құрлықтық хоккей лигасының кезекті турында астаналық «Барыс» сырт алаңда «Северстальмен» кездесіп, маңызды ұпайына қол жеткізді.

Матчтың негізгі есебі тең аяқталған. Бірінші шайбаны астаналық клуб ойыншылары 8-минутта соқты, гол авторы – Камара. Араға жеті минут салып айдын иелері сапынан Иванцов көзге түсіп, есепті теңестірді.

Ал, екінші кезеңде «Северсталь» алға шыққанымен, «Барыс» сапынан Рахманов 32-минутта таразы басын қайта теңестірді. Үшінші кезеңде гол соғылған жоқ.

Осылайша матч овертаймға өтіп, қосымша кезеңнің үш минутқа жетер-жепес уақытында Рымарев «Барысқа» жеңіс алып келді.

Еске салайық, 30 қарашада астаналық хоккейшілер Магнитогорск қаласының «Металлург» клубын сырт алаңда 5:2 есебімен ойсырата жеңді. Осыған қарамастан «Барыс» турнир кестесінің ең соңғы орнында тұр.