«Барыс» жаңа бапкермен алғашқы жеңісіне қол жеткізді

Жеңілістен көз ашпаған «Барыс» хоккей клубы бас бапкерін ауыстырғаннан кейінгі бірінші матчта жеңіске жетті. Астанада «Сочиді» қабылдаған Вячеслав Буцаев шәкірттері 1:0 есебімен басым түсті.

Ойындағы жалғыз голды бірінші периодта Уэйд Эллисон соқты. Мұнан кейін қос команда да өткір шабуылдағанымен, қалған 40 минутта мүлдем гол соғылған жоқ.

Айта кетейік, «Барыс» хоккей клубын маусым басталғанда Дэвид Немировский жаттықтырған болатын. Алайда, ҚХЛ-дегі сегіз ойынның жетеуінде жеңілгеннен кейін ресейлік маман отставкаға кетті.

Тоғыз матчтан кейін небәрі 5 ұпай жинаған астаналық клуб турнир кестесінің соңғы 12-сатысында келеді. Келесі матчты астаналықтар 28 қыркүйекте өз айдынында «Витязь» командасына қарсы өткізеді.