Қазақстан хоккейшілері тарихында алғаш рет Азия чемпионы атанды
Құрлық біріншілігі Алматыда өтті
Хоккейден Азия чемпионатында Қазақстанның ерлер құрамасы тарихында алғаш рет жеңімпаз атанды.
Соңғы шешуші матчта Болякин шәкірттері Жапония құрамасымен кездескен болатын. Ойын 5:1 есебімен қазақстандықтардың жеңісімен аяқталды. Қазақстан сапынан Евгений Рымарев дубль авторы атанса, Егор Наместников, Владимир Гребенщиков және Евгений Королинский бір-бір голдан соқты. Ал, жапон командасынан Таига Ирикура көзге түсті.
Осылайша, үш ойыннан кейін алты ұпай жинаған Қазақстан құрамасы Азия чемпионы атанды. Жапония да алты ұпай жинағанымен, өзара кездесудің нәтижесі жеңімпазды анықтап отыр.
Еске салайық, бірінші ойында Оңтүстік Кореядан жеңілген біздің елдің командасы қалған екі матчта Қытай мен Жапонияны тізе бүктірді.