Антирекорд: «Барыс» қатарынан төртінші ойынын жеңіліп, оның екеуінде мүлдем гол соқпады
Астаналық клуб соңғы екі матчта өз қақпасына 9 шайба жіберіп алған
Құрлықтық хоккей лигасының кезекті туры аясында астаналық «Барыс» Тольяттиде жергілікті «Ладамен кездесіп, 0:2 есебімен жеңіліп қалды.
Ойын аса тартысты өтті деп айтуға келмейді. Бірінші кезеңнің 18-минутында алаң иелері сапынан Николай Демидов гол соққаннан кейін, матч аяқталар тұсқа дейін жанкүйерлер гол көрген жоқ. Тек 54-минутта «Барыс» ойыншысы өрескел тәртіп бұзғаннан кейін төреші астаналықтардың қақпасына буллит белгілеп, оны Остап Сафин дәл орындады.
Осы жеңістен кейін «Лада» Шығыс конференциясындағы бесінші орнын нығайтып, плей-офф кезеңіне бір табан жақындай түсті. Ал, «Барыс» болса 44 ұпаймен соңғы орындардың біріне орнықты (11-орын).
Келесі матчты Олег Болякин шәкірттері 28 қаңтарда өз айдынында Қазанның «Ақ Барсымен» өткізеді.