«Мылжың еместігімді дәлелдедім»: Жалғас Жұмағұлов қазақстандықтарға үндеу жасады
Ол алғаш рет чемпиондық атағын қорғады.
Oktagon лигасында аса жеңіл салмақта чемпиондық белбеуін алғаш рет қорғаған ММА жауынгері Жалғас Жұмағұлов қазақстандық жанкүйерлерге жүрекжарды үндеу жасады.
«Бұл – баршамыздың ортақ жеңісіміз. Елдің, халықтың жеңісі. Маған жанкүйер болған әрқайсыңызға үлкен рахмет. Чемпиондық белбеуді қорғап, көк туымызды биікке көтергеніме қуаныштымын. Мылжың еместігімді кезекті мәрте дәлелдедім. Мені қолдағандарға да, қолдамағандарға да рахмет. Бүгін біз жеңіске жеттік. Бұған дейін де айтқанмын, қазір 37 жастамын, ал қазақтар 35-тен кейін ашыла түседі. Қандай деңгейге жеткенімді өздеріңіз де көрдіңіздер. Тынымсыз еңбек еттім, темірдей тәртіп сақтадым. Екі ай бойы қатаң диета ұстадым. Бір артық қадам жасаған жоқпын. Барлығы режимге сай өтті. Бүгінгі жеңіс – соның нәтижесі», – деді Жалғас Жұмағұлов әлеуметтік желідегі парақшасында.
Еске сала кетейік, 28-інен 29 желтоқсанға қараған түні Жалғас Жұмағұлов Прагада (Чехия) өткен Oktagon 81 турнирінде жергілікті файтер Давид Дворжакты мерзімінен бұрын жеңіп, чемпиондық атағын сәтті қорғады.