UFC Асу Алмабаевты алмастыратын спортшыны атады
Ол рейтингке енбеген.
UFC жарақат алып қалған қазақстандық файтер Асу Алмабаевтың орнына жаңа спортшыны бекітті. Алмабаевтың орнына октагонға Англия өкілі Лонир Кавана шығады. Бұл туралы журналист Эл Зулино хабарлады.
Лонир Кавана – 26 жаста. Оның аралас жекпе-жектегі көрсеткіші – 9 жеңіс, 1 жеңіліс, ал UFC-дегі рекорды – 2-1. Соңғы жекпе-жегінде ағылшын спортшысы америкалық Чарльз Джонсоннан нокаутпен ұтылып, кәсіби мансабында алғаш рет жеңіліс тапты. Бұған дейін Кавана 14 наурызда бразилиялық Бруно Сильвамен айқасуы тиіс болған.
Айта кетейік, бұл жекпе-жек Брэндон Морено үшін де ерекше болмақ. Мексикалық экс-чемпион 2019 жылдан бері алғаш рет рейтингке енбеген спортшымен күш сынасады.
Ал Асу Алмабаев жекпе-жектен шет қалуына байланысты әлеуметтік желіде түсініктеме беріп, кездесуден бас тарту оның спорттық ұстанымына мүлде сай келмейтінін айтты.
«Жағдай осылай болып тұр – аяқ астынан жарақат алып қалдық. Ұшуға екі күн қалғанда болды. Жарақат айтып келмейді. Мен ешқашан жекпе-жектен қашқан емеспін. Қарсылас кім болса да, қандай жағдай болмасын, дайындық әрдайым жоғары деңгейде өтті. Болар іс болды, енді қанша қиналсаң да, жағдайды өзгерту мүмкін емес», – деді Алмабаев.
UFC Mexico турнирі Қазақстан уақытымен 1 наурызға қараған түні өтеді.